បន្ទាយមានជ័យ៖ នៅព្រឹកថ្ងៃទី១០ ខែសីហា ឆ្នាំ២០២៦នេះ ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) សម័យប្រឡងឆ្នាំ២០២៦ បានបើកជាផ្លូវការហើយក្រោមបរិយាកាសអធិកអធម ម៉ត់ចត់ តឹងតែង និងប្រកាន់ខ្ជាប់យ៉ាងតឹងរឹងនូវគោលការណ៍ច្បាប់ យុត្តិធម៌ តម្លាភាព និងគុណភាព។
ពិធីបើកកញ្ចប់វិញ្ញាសាប្រឡងជាផ្លូវការ ត្រូវបានរៀបចំឡើងយ៉ាងផុសផុលនៅមណ្ឌល វិទ្យាល័យ សិរីសោភ័ណ ស្ថិតនៅក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ និងឯកឧត្តម កុលផេង វឌ្ឍនា រដ្ឋលេខាធិការក្រសួងអប់រំ យុវជន និងកីឡា។ ពិធីដ៏មានសារៈសំខាន់នេះ ក៏មានវត្តមានចូលរួមពីសំណាក់តំណាងអង្គភាពប្រឆាំងអំពើពុករលួយ (អ.ព.ព) គណៈមេប្រយោគទូទាំងប្រទេស អាជ្ញាធរដែនដី និងមន្ត្រីពាក់ព័ន្ធជាច្រើនរូបទៀតផងដែរ។
📊 ស្ថិតិបេក្ខជនសរុប និងការប្រៀបធៀបជាមួយឆ្នាំ២០២៥
យោងតាមការបញ្ជាក់ផ្លូវការពីលោក ឈូ ប៊ុនរឿង ប្រធានមន្ទីរអប់រំ យុវជន និងកីឡា ខេត្តបន្ទាយមានជ័យ បានបង្ហាញថា សម្រាប់សម័យប្រឡងឆ្នាំ២០២៦នេះ ខេត្តបន្ទាយមានជ័យមានបេក្ខជនក្នុងបញ្ជីសរុបចំនួន ៦,៥០២នាក់ (ស្រី ៣,៧០៧នាក់) ដោយបែងចែកជា៣ប្រភេទ៖
* បេក្ខជនចំណេះទូទៅ៖ ៥,៨៨៧នាក់ (ស្រី ៣,៥៤២នាក់)
* បេក្ខជនស្វ័យរិន៖ ៤២៧នាក់ (ស្រី ១៣៥នាក់)
* បេក្ខជនបំពេញវិជ្ជា៖ ១៨៨នាក់ (ស្រី ៣០នាក់)
បើធ្វើការប្រៀបធៀបទៅនឹងឆ្នាំ២០២៥កន្លងទៅ គឺចំនួនបេក្ខជនឆ្នាំនេះមានការថយចុះបន្តិចបន្តួច ពោលគឺឆ្នាំ២០២៥ មានបេក្ខជនសរុប ៦,៥៥២នាក់ (ស្រី ៣,៧២៥នាក់) ដែលបញ្ជាក់ថា ឆ្នាំ២០២៦នេះ មានបេក្ខជនសរុប តិចជាង ៥០នាក់ និងបេក្ខជនស្រី តិចជាង ១៨នាក់ ធៀបនឹងឆ្នាំមុន។
🏫 ការរៀបចំមណ្ឌល និងបន្ទប់ប្រឡងទូទាំងខេត្ត
ទូទាំងខេត្តបន្ទាយមានជ័យ ដំណើរការប្រឡងត្រូវបានរៀបចំយ៉ាងមានរបៀបរៀបរយនៅកណ្តាលក្រុងសិរីសោភ័ណ ដោយបែងចែកជា ៨មណ្ឌល ស្មើនឹង ២៦១បន្ទប់សរុប រួមមាន៖
១. ថ្នាក់វិទ្យាសាស្ត្រ (ចំនួន ៣មណ្ឌល ស្មើនឹង ៦៩បន្ទប់)៖
* វិទ្យាល័យ ហ៊ុន សែន ខ្លាកូន (២៥ បន្ទប់)
* អនុវិទ្យាល័យ ទឹកថ្លា (២៣ បន្ទប់)
* សាកលវិទ្យាល័យជាតិមានជ័យ (២១ បន្ទប់)
២. ថ្នាក់វិទ្យាសាស្ត្រសង្គម (ចំនួន ៥មណ្ឌល ស្មើនឹង ១៩២បន្ទប់)៖
* វិទ្យាល័យ សិរីសោភ័ណ (៤៥ បន្ទប់)
* សាលាបឋមសិក្សា ហ៊ុន សែន សូភី (៣០ បន្ទប់)
* វិទ្យាល័យ សម្តេចឪ (៣៦ បន្ទប់)
* សាកលវិទ្យាល័យគ្រប់គ្រង និងសេដ្ឋកិច្ច (UME)
* វិទ្យាល័យ អូរអំបិល (៤០ បន្ទប់)
> 💡 ចំណាំ៖ ក្រុមការងារអន្តរាគមន៍ និងកងកម្លាំងមានសមត្ថកិច្ចចម្រុះគ្រប់លំដាប់ថ្នាក់ បានខិតខំប្រឹងប្រែងយ៉ាងសកម្មក្នុងការថែរក្សាសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយយ៉ាងល្អប្រសើរនៅតាមមុខមណ្ឌលប្រឡងនីមួយៗ ដើម្បីធានាឲ្យប្អូនៗនុសិស្សទាំងអស់អាចបំពេញកិច្ចការប្រឡងប្រកបដោយភាពស្ងប់ចិត្ត ទំនុកចិត្តខ្ពស់ និងភាពជោគជ័យ៕
អត្ថបទព័ត៌មានទាន់ហេតុការណ៍ ២៤ម៉ោង ដោយលោក ហ៊ីង ចាន់ថន អ្នកសារព័ត៌មាន SNTV ប្រចាំខេត្តបន្ទាយមានជ័យ
