ខេត្តបន្ទាយមានជ័យ៖ ត្រឹមតែរឿងខឹងសម្បារបន្តិចបន្តួច ជនសង្ស័យចិត្តអប្រិយម្នាក់បានប្រើប្រាស់អំពើហិង្សាដោយយកដំបងឈើ និងខ្សែក្រវ៉ាត់វាយទៅលើកុមារីរងគ្រោះអាយុទើបតែ១១ឆ្នាំយ៉ាងចាស់ដៃ បណ្តាលឱ្យរងរបួសធ្ងន់ធ្ងរ កពកក្បាល និងជាំពេញខ្លួន ត្រូវបញ្ជូនសង្គ្រោះបន្ទាន់នៅមន្ទីរពេទ្យបង្អែក។ ក្រោយធ្វើសកម្មភាពមិនបានប៉ុន្មានផង ត្រូវកម្លាំងកងរាជអាវុធហត្ថក្រុងប៉ោយប៉ែតតាមក្របួចបានទាន់ពេលវេលា រួចបញ្ជូនទៅកាន់សាលាដំបូងខេត្តនៅថ្ងៃសុក្រ ទី២១ ខែសីហា ឆ្នាំ២០២៦នេះ។
យោងតាមរបាយការណ៍ពីសមត្ថកិច្ចបានឱ្យដឹងថា នៅថ្ងៃទី១៨ ខែសីហា ឆ្នាំ២០២៦ កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត បានទទួលពាក្យបណ្តឹងពីឈ្មោះ សេង ប្រុស អាយុ៥៨ឆ្នាំ (ត្រូវជាជីតារបស់ជនរងគ្រោះ រស់នៅមណ្ឌល៨ ភូមិប្រជាធម្មកើត សង្កាត់អូរឫស្សី ក្រុងប៉ោយប៉ែត) ពាក់ព័ន្ធនឹងករណីហិង្សាដោយចេតនាមានស្ថានទម្ងន់ទោស។ ហេតុការណ៍ដ៏ក្ដុកក្ដួលនេះបានកើតឡើងតាំងពីវេលាម៉ោង១៦និង៣០នាទី ថ្ងៃទី១៦ ខែសីហា ឆ្នាំ២០២៦ ដោយបង្កឡើងដោយជនសង្ស័យឈ្មោះ សេង កូ ភេទប្រុស អាយុ៣០ឆ្នាំ បានយកដំបងឈើ និងខ្សែក្រវ៉ាត់វាយទៅលើកុមារីរងគ្រោះឈ្មោះ សុខ ផ្លយ អាយុ១១ឆ្នាំ យ៉ាងព្រៃផ្សៃ បណ្តាលឱ្យពកក្បាលផ្នែកខាងក្រោយ១កន្លែង មានស្នាមជាំពេញខ្នង និងដើមដៃខាងឆ្វេង ខណៈបច្ចុប្បន្នជនរងគ្រោះកំពុងសម្រាកព្យាបាលយ៉ាងវេទនានៅមន្ទីរពេទ្យបង្អែក។
ក្រោយទទួលបានបណ្តឹងពីជីតាជនរងគ្រោះ លោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែត បានដឹកនាំកម្លាំងចុះស្រាវជ្រាវភ្លាមៗ រហូតដល់ថ្ងៃទី១៩ ខែសីហា ឆ្នាំ២០២៦ ទើបឈានដល់ការឃាត់ខ្លួនជនសង្ស័យឈ្មោះ សេង កូ ព្រមទាំងដកហូតវត្ថុតាងដំបងឈើ និងខ្សែក្រវ៉ាត់ នៅចំណុចកើតហេតុខាងលើ។ មិនតែប៉ុណ្ណោះ ពេលយកមកសួរនាំ សមត្ថកិច្ចបានធ្វើតេស្តទឹកនោមរកសារធាតុញៀនជាលទ្ធផលរកឃើញថា វិជ្ជមាន (+) ញៀនថ្នាំ បន្ថែមទៀតផង។
លោកអនុសេនីយ៍ឯក តិល តៃលីវ បានបញ្ជាក់ថា ក្រោយការសួរនាំ ជនសង្ស័យបានសារភាពយ៉ាងកំរោលថា ខ្លួនពិតជាបានយកដំបងឈើ និងខ្សែក្រវ៉ាត់វាយទៅលើកុមារីរងគ្រោះពិតប្រាកដមែន ដោយសារតែខឹងនឹងជនរងគ្រោះអាយុក្មេងជាងហើយហ៊ាននិយាយស្តីជេរប្រមាថមកលើរូបខ្លួន។
ផ្អែកលើចម្លើយសារភាព វត្ថុតាងជាក់ស្តែង និងបទល្មើសជាក់ស្តែង កម្លាំងមូលដ្ឋានកងរាជអាវុធហត្ថក្រុងបានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្ត។ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស បានឱ្យដឹងថា ការបង្ក្រាបនេះធ្វើឡើងក្រោមការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី ឯកឧត្តម កើត វណ្ណារ៉េត ព្រះរាជអាជ្ញាអមសាលាដំបូងខេត្ត។
បច្ចុប្បន្ន ជនសង្ស័យចិត្តតិរច្ឆានរូបនេះ ត្រូវបានកម្លាំងការិយាល័យព្រហ្មទណ្ឌ នៃកងរាជអាវុធហត្ថខេត្ត បញ្ជូនខ្លួនដល់សាលាដំបូងខេត្តហើយ ដើម្បីចាត់ការតាមច្បាប់យ៉ាងតឹងរ៉ឹងបំផុត គ្មានការលើកលែងឡើយ!
រាយការណ៍ដោយ៖ លោក ហ៊ីង ចាន់ថន សារព័ត៌មាន SNTV ប្រចាំខេត្តបន្ទាយមានជ័យ