(បន្ទាយមានជ័យ)៖ កម្លាំងជំនាញរបស់កងរាជអាវុធហត្ថខេត្តបន្ទាយមានជ័យ បានសម្រេចបញ្ជូនខ្លួនជនសង្ស័យចំនួន ២នាក់ ទៅកាន់សាលាដំបូងខេត្តហើយ នៅព្រឹកថ្ងៃសៅរ៍ ទី១៧ ខែតុលា ឆ្នាំ២០២៦នេះ ដើម្បីអនុវត្តតាមនីតិវិធីច្បាប់ ពាក់ព័ន្ធនឹងករណីជួញដូរ និងប្រើប្រាស់ដោយខុសច្បាប់នូវសារធាតុញៀន។
យោងតាមរបាយការណ៍បានឲ្យដឹងថា ប្រតិបត្តិការបង្ក្រាបនេះបានធ្វើឡើងតាំងពីវេលាម៉ោង ០៩:០០នាទីព្រឹក ថ្ងៃទី១៥ ខែតុលា ឆ្នាំ២០២៦ ដោយកម្លាំងមូលដ្ឋានកងរាជអាវុធហត្ថក្រុងសិរីសោភ័ណ ក្រោមការដឹកនាំផ្ទាល់របស់ លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ ដោយបានចុះស្រាវជ្រាវ និងបង្ក្រាបទាន់ពេលវេលាត្រង់ចំណុច ភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
ក្នុងកិច្ចប្រតិបត្តិការនោះ កម្លាំងជំនាញបានឃាត់ខ្លួនជនសង្ស័យចំនួន ២នាក់ រួមមាន៖
* ឈ្មោះ ជា សុខាន់ ហៅ ពៅ ភេទប្រុស អាយុ ១៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្ន ភូមិ៤ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ (ករណីជួញដូរ)।
* ឈ្មោះ អ៊ី ថានិត ភេទប្រុស អាយុ ២៥ឆ្នាំ ជនជាតិខ្មែរ មុខរបរធ្វើស្រែ មានទីលំនៅបច្ចុប្បន្ន ភូមិស្រះរាំង ឃុំស្រះរាំង ស្រុកមង្គលបូរី ខេត្តបន្ទាយមានជ័យ (ករណីជួញដូរ និងប្រើប្រាស់)।
ជាលទ្ធផលនៃការត្រួតពិនិត្យ និងឆែកឆេរ កម្លាំងជំនាញបានដកហូតវត្ថុតាងរួមមាន៖
* គ្រឿងញៀនប្រភេទម្ស៉ៅក្រាមពណ៌សថ្លា (ICE) ចំនួន ០៣ថង់កិប ទម្ងន់ ២១,៦៥ក្រាម
* ម៉ូតូ ចំនួន ០២គ្រឿង
* ទូរស័ព្ទដៃ ចំនួន ០២គ្រឿង
ក្រោយពេលឃាត់ខ្លួន និងនាំមកកាន់មូលដ្ឋានកងរាជអាវុធហត្ថក្រុងដើម្បីធ្វើការសួរនាំ ជនសង្ស័យទាំងពីរនាក់បានឆ្លើយសារភាពថា ពួកខ្លួនពិតជាបានទិញគ្រឿងញៀនទាំងនោះមកដើម្បីលក់ផង និងប្រើប្រាស់ដោយខ្លួនឯងផង។
ផ្អែកលើ ចម្លើយសារភាព និង វត្ថុតាងជាក់ស្តែង កម្លាំងមូលដ្ឋានកងរាជអាវុធហត្ថក្រុងបានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថខេត្តដើម្បីចាត់ការបន្ត។ លោកវរសេនីយ៍ទោ ព្រហ្ម ថេង ប្រធានមន្ទីរស្រាវជ្រាវ និងបង្ក្រាបបទល្មើស បានបញ្ជាក់ថា ការបង្ក្រាបករណីខាងលើនេះ គឺទទួលបានការអនុញ្ញាតដ៏ខ្ពង់ខ្ពស់ពី លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ។
បច្ចុប្បន្ន ជនសង្ស័យទាំងពីរនាក់ រួមជាមួយវត្ថុតាងខាងលើ ត្រូវបានកម្លាំងការិយាល័យប្រឆាំងគ្រឿងញៀន នៃកងរាជអាវុធហត្ថខេត្ត បញ្ជូនខ្លួនដល់សាលាដំបូងខេត្តរួចរាល់ហើយ ដើម្បីចាត់ការតាមផ្លូវច្បាប់បន្តទៀត។
📢 ព័ត៌មានថ្មីទាន់ហេតុការណ៍២៤ម៉ោង
✍️ រាយការណ៍ដោយ៖ លោក ហ៊ីង ចាន់ថន ពីសារព័ត៌មាន SNTV ប្រចាំខេត្តបន្ទាយមានជ័យ








