(បន្ទាយមានជ័យ)៖ រឿងរ៉ាវដ៏រន្ធត់ និងក្ដៅគគុកមួយបានផ្ទុះឡើងនៅក្រុងប៉ោយប៉ែត! ម្ចាស់ហាង «កាកាសាឡន» ត្រូវបានកម្លាំងកងរាជអាវុធហត្ថខេត្តបន្ទាយមានជ័យ បញ្ជូនខ្លួនទៅកាន់សាលាដំបូងខេត្តនៅព្រឹកថ្ងៃចន្ទ ទី២៩ ខែមិថុនា ឆ្នាំ២០២៦ នេះ បន្ទាប់ពីបានប្រព្រឹត្តអំពើហិង្សា និងចាប់បង្ខាំងមនុស្សខុសច្បាប់យ៉ាងឃោរឃៅ។
ជនសង្ស័យឈ្មោះ គុំ លីកា ហៅ កាកា អាយុ ៣០ឆ្នាំ បានបង្ហាញពីចិត្តគំនិតដ៏កាចសាហាវទៅលើជនរងគ្រោះឈ្មោះ អ៊ុត ខុន អាយុ ៥៩ឆ្នាំ ដែលធ្លាប់រស់នៅជាមួយខ្លួនដូចម្តាយកូនអស់រយៈពេលជាង ៣ ឆ្នាំ។
អ្វីដែលធ្វើឱ្យមហាជនក្តៅក្រហាយនោះគឺ៖
គ្រាន់តែខឹងរឿងជនរងគ្រោះលួចយកទូរសព្ទរបស់សង្សារខ្លួនទៅលក់បាន ២០ ម៉ឺនរៀល ជនសង្ស័យបានប្រើកំណាត់ឈើវាយជនរងគ្រោះរហូតចេញឈាមពេញខ្លួន។
មិនត្រឹមតែប៉ុណ្ណោះ ជនសង្ស័យបានយក «កាំបិតប៉័ងតោ» មកគំរាមកាត់ម្រាមដៃជើងជនរងគ្រោះទាំងរស់ ហើយបង្ខាំងទុកមិនឱ្យចេញទៅក្រៅដាច់ខាត។
ដោយទ្រាំនឹងទារុណកម្មមិនបាន នៅវេលាម៉ោង ០៤៖០០ ទៀបភ្លឺថ្ងៃទី ១៤ ខែមិថុនា ជនរងគ្រោះបានសម្រេចចិត្តប្រថុយជីវិតឡើងដំបូលផ្ទះ រួចសម្រូតខ្លួនតាមចម្រឹងដែកចុះមកក្រោម ដើម្បីរត់គេចខ្លួនទាំងរបួសពេញខ្លួន ទៅដាក់ពាក្យបណ្តឹងនៅកងរាជអាវុធហត្ថក្រុងប៉ោយប៉ែត។
ក្រោយទទួលបានបណ្តឹង កម្លាំងជំនាញដឹកនាំដោយលោកអនុសេនីយ៍ឯក តិល តៃលីវ មេបញ្ជាការមូលដ្ឋានកងរាជអាវុធហត្ថក្រុង បានបើកការស្រាវជ្រាវយ៉ាងក្តៅគគុក រហូតឈានដល់ការឃាត់ខ្លួនជនសង្ស័យនៅថ្ងៃទី ២៨ ខែមិថុនា រួមទាំងដកហូតវត្ថុតាងកាំបិតប៉័ងតោមួយដើម។
ជនសង្ស័យបានឆ្លើយសារភាពចំពោះមុខសមត្ថកិច្ចថា ខ្លួនពិតជាបានប្រព្រឹត្តអំពើហិង្សានេះមែន។ បច្ចុប្បន្ន ជនសង្ស័យកំពុងស្ថិតក្នុងដៃតុលាការ ដើម្បីអនុវត្តតាមនីតិវិធីច្បាប់យ៉ាងតឹងរ៉ឹងបំផុត៕
*រាយការណ៍ដោយ៖ លោក ហ៊ីង ចាន់ថន | សារព័ត៌មាន SNTV ប្រចាំខេត្តបន្ទាយមានជ័យ*
